💁‍♂ मिस युनिव्हर्स स्पर्धेशी संबंधित ‘ही’ घटना, ज्यामुळे सुष्मिताला आवरले नव्हते अश्रू

बॉलिवूड (Bollywood) अभिनेत्री सुष्मिता सेननं (Sushmita Sen) २६ वर्षांपूर्वी ‘मिस युनिव्हर्स’चा (Miss Universe 1994) किताब जिंकला आहे. मिस युनिव्हर्सचा किताब जिंकणारी सुष्मिता ही पहिली भारतीय महिला ठरली होती. या ऐतिहासिक क्षणाशी संबंधित सर्व आठवणी आजही सुष्मिताच्या चांगल्या लक्षात आहेत. याच कारणामुळे जेव्हा-जेव्हा मिस युनिव्हर्स स्पर्धेबाबत काहीही विचारलं जाते, तेव्हा-तेव्हा सुष्मिता अशा पद्धतीनं स्पर्धेच्या आठवणींना उजाळा देते की जणू काही सर्व घटना काल परवाच घडल्या आहेत. एका मुलाखतीत सुष्मिताला मिस युनिव्हर्स स्पर्धेसाठी तिनं घेतलेले कष्ट, तिच्या प्रवासाबाबतचे प्रश्न विचारण्यात आले होते. यादरम्यान एक असा किस्सा सुष्मिताने सांगितला, ज्यामुळे तिला अश्रू आवरणं कठीण झाले होते. नेमकी काय आहे ही घटना, जाणून घेऊया याबाबतची सविस्तर माहिती

​मुलाखतीत सांगितला पूर्ण किस्सा

२०१९मध्ये सुष्मिता सेननं एक मुलाखत दिली होती. या मुलाखतीत तिनं मिस इंडिया आणि मिस युनिव्हर्स स्पर्धेसाठी तिने केलेले कष्ट, आठवणींना उजाळा दिला होता. मिस युनिव्हर्स १९९४ स्पर्धेसाठी फिलिपीन्स येथे जायचे होते, असे तिनं सांगितलं. त्यावेळेस नेमका तिचा पासपोर्ट हरवला होता. ‘तेव्हा मी माझा पासपोर्ट त्या काळातील फेमस मॉडेल आणि इव्हेंट कॉर्डिनेटर अनुपमा वर्मा यांच्याकडे दिला होता. बांगलादेशातील एका कार्यक्रमासाठी ओळखपत्राचा पुरावा म्हणून त्याची आवश्यकता होती’, असे सुष्मितानं सांगितलं.

​जेव्हा सुष्मिताचा पासपोर्ट हरवला...

'माझा पासपोर्ट चांगल्या व्यक्तीच्या हातामध्ये अगदी सुरक्षित आहे, असा माझा आत्मविश्वास होता', असे सुष्मिताला वाटत होतं. तिनं आयोजकांनाही हेच सांगितलं होतं.

थोड्या वेळानं समजलं की अनुपमाने तिचा पासपोर्टच (Passport Lost) हरवला. या घटनेची जबाबदारी अनुपमानं स्वीकारली देखील आणि परिस्थिती हाताळण्यास असमर्थताही दाखवली. पासपोर्ट मिळाला नसल्याची माहिती जशी सुष्मिताला समजली तशी तिची घाबरगुंडी उडाली. आता नेमकं काय करावे? हेच तिला कळत नव्हतं.

​सुष्मिताऐवजी ऐश्वर्या रायला स्पर्धेसाठी पाठवण्याची तयारी

यादरम्यान सुष्मिताला असं समजलं की पासपोर्ट नसल्याच्या कारणामुळे मिस इंडिया स्पर्धेचे आयोजक रनरअप ठरलेल्या ऐश्वर्या रायला मिस युनिव्हर्स स्पर्धेसाठी पाठवण्याचा विचार करत आहेत. आयोजकांनी सांगितलं की 'मिस वर्ल्ड स्पर्धा' नोव्हेंबरमध्ये म्हणजे ‘मिस युनिव्हर्स’ स्पर्धेनंतर होणार असल्यानं तोपर्यंत सुष्मिताच्या पासपोर्टची समस्या सोडवण्यासाठी आपल्याकडे बराच वेळ आहे. हे ऐकल्यानंतर प्रचंड राग आल्याचंही सुष्मितानं सांगितलं.

तिनं मुलाखतीत सांगितलं की, कष्ट आणि प्रामाणिकपणाच्या जोरावर मिस इंडियाची स्पर्धा जिंकली होती. इतका मोठा पल्ला गाठल्यानंतर माझ्या ऐवजी दुसऱ्या कोणाला तरी संधी मिळणं हे मान्य नव्हते.

(सुष्मिता सेननं ४ वर्ष सहन केल्या आजाराच्या वेदना, या रोगाचा महिलांना सर्वाधिक धोका)

​रडून-रडून झाली होती वाईट अवस्था

सुष्मितानं सांगितलं की, या सर्व गोष्टी ऐकल्यानंतर मी वडिलांची भेट घेतली आणि त्यांच्यासमोर भरपूर रडले होते. तिनं वडिलांना थेट सांगितलं की मी फक्त मिस युनिव्हर्स स्पर्धेमध्येच सहभागी होणार. आयोजकांच्या कृतीबाबत तिनं आपल्या वडिलांसमोर तीव्र नाराजीही व्यक्त केली. पुढे ती असंही म्हणाले होती की, ‘मी मिस इंडियाचा किताब जिंकला कारण मीच मिस युनिव्हर्स स्पर्धेमध्ये सहभागी होण्यास पात्र होते. जर मी त्या स्पर्धेत सहभागी होऊ शकत नाही तर दुसऱ्या कोणत्यात व्यक्तीनं त्या स्पर्धेत सहभागी होऊ नये’

(लग्नामध्ये ऐश्वर्या रायला सासूकडे मिळाली होती मौल्यवान दागिन्यांची भेट)

​अशी सुटली समस्या

सुष्मिताची अवस्था तिच्या वडिलांना पाहवली गेली नाही. म्हणून सुष्मिताला पासपोर्ट मिळवून देण्यासाठी ते व्यवस्था करण्याचं काम करू लागले. तत्कालिन केंद्रीय मंत्री राजेश पायलट यांची त्यांनी भेट घेतली घेतली आणि त्यांना सांगितलं की मिस युनिव्हर्स स्पर्धेमध्ये सुष्मिता देशाचं प्रतिनिधित्व करणार आहे. यासाठी तिला शक्य तितकी सर्व मदत केली पाहिजे. सुष्मिताच्या वडिलांची ही विनंती कामी आली आणि मिस युनिव्हर्स स्पर्धेच्या पूर्वीच तिला पासपोर्ट देखील मिळाला. यानंतर १९९४ मध्ये पार पडलेल्या स्पर्धेमध्ये सुष्मितानं विश्वसुंदरी स्पर्धेचा किताब जिंकला आणि मिस युनिव्हर्सची स्पर्धा जिंकणारी पहिली भारतीय महिला हा बहुमान देखील मिळवला.