राजीनाम्याचं पत्रं हातात पडताच ऋजुता लटकेंचा एल्गार, आयुक्तांना लगावला टोला

उच्च न्यायालयाने कान टोचल्यानंतर अखेर मुंबई महानगरपालिकेने शुक्रवारी शिवसेनेच्या अंधेरी पूर्व विधानसभा मतदारसंघातील उमेदवार ऋतुजा लटके यांना राजीनाम्याचे पत्र सुपूर्द केले. उच्च न्यायालयाच्या आदेशानुसार आम्ही आपला राजीनामा स्वीकारत आहोत, असे महापालिकेने पत्रात नमूद केले आहे. यानंतर ऋतुजा लटके यांनी प्रसारमाध्यमांशी संवाद साधताना पालिका आयुक्त इकबाल सिंह चहल यांना टोला लगावला. राजीनाम्यासाठी संघर्ष करण्याची माझी अजिबात इच्छा नव्हती. मी इतकी वर्षे पालिकेत लिपीक म्हणून काम केले. पण राजीनाम्यासारख्या गोष्टी आयुक्तांपर्यंत नेल्या जातात, याचेच मला आश्चर्य वाटते, अशी खोचक टिप्पणी ऋतुजा लटके यांनी केली.

आता मी अंधेरीत जाऊन उमेदवारी अर्ज भरणार आहे. मशाल हे चिन्ह आमच्यासाठी नवीन नाही. १९८५ साली छगन भुजबळ याच निशाणीवर निवडून आले होते. त्यामुळे मशाल आपल्यासाठी शुभ आहे. हे चिन्ह मिळाल्यामुळे आपल्याला लवकरच सकारात्मक बदल दिसतील, असे ऋतुला लटके यांनी म्हटले. आता मी शिवसेनेतील (उद्धव बाळासाहेब ठाकरे गट)ज्येष्ठ नेते ठरवतील त्याप्रमाणे प्रचार करेन. माझे पती रमेश लटके यांचे नाव अंधेरी पूर्व विभागात सर्वांना माहिती होते. परंतु, माझा चेहरा मतदारांना तितकासा माहिती नाही. त्यामुळे मला मतदारसंघात थोडेफार फिरावे लागेल. त्यासाठी ज्येष्ठ नेते ठरवतील त्याप्रमाणे मी शिवसैनिकांसोबत मतदारसंघात फिरेन. महाविकास आघाडी उद्धव ठाकरे साहेबांसोबत आहे, याचा मला आनंद आहे, असे ऋतुजा लटके यांनी सांगितले.

आता ऋतुजा लटके या अंधेरी पूर्व विधानसभा मतदारसंघात पदयात्रा काढणार आहेत. त्यानंतर दुपारच्या सुमारास शिवसेना, काँग्रेस आणि राष्ट्रवादी काँग्रेसच्या नेत्यांच्या उपस्थितीत ऋतुजा लटके आपला उमेदवारी अर्ज भरतील. यानिमित्ताने ठाकरे गटाकडून मोठे शक्तीप्रदर्शन केले जाण्याची शक्यता आहे. तर भाजपकडून मुरजी पटेल हेदेखील आजच आपला उमेदवारी अर्ज दाखल करणार आहेत. यावेळी मुंबई प्रदेशाध्यक्ष आशिष शेलार आणि महाराष्ट्र प्रदेशाध्यक्ष चंद्रशेखर बावनकुळे हेदेखील उपस्थित राहतील. अंधेरी पूर्व विधानसभा मतदारसंघात ३ नोव्हेंबर रोजी पोटनिवडणूक होत आहे. ६ नोव्हेंबर रोजी या पोटनिवडणुकीचा निकाल जाहीर केला जाईल.

पोटनिवडणुकीच्या रिंगणात आणखी तीन उमेदवार

अंधेरी पोटनिवडणुकीसाठी गुरुवारपर्यंत एकूण ३ जणांनी अर्ज दाखल केले आहे. हिंदुस्थान जनता पार्टीचे राकेश विश्वनाथ अरोरा, अपक्ष म्हणून मिलिंद काशिनाथ कांबळे, अपक्ष म्हणून नीना गणपत खेडेकर यांनी आपली नामनिर्देशन पत्रे निवडणूक निर्णय अधिकारी यांच्याकडे दाखल केली.